சென்னை: தமிழகத்தில் பொறியியல் படிப்புகளுக்கான ஆன்லைன் விண்ணப்ப பதிவு நேற்று தொடங்கியது. தமிழகத்தில் பொறியியல் (பிஇ) படிப்புகளுக்கான விண்ணப்ப பதிவு ஜூன் 20ம் தேதி முதல் துவங்கும் என உயர்கல்வித்துறை அமைச்சர் பொன்முடி கடந்த 8ம் தேதி அறிவித்தார். இந்தநிலையில் தமிழகத்தில் பிளஸ் 2 பொதுத்தேர்வு முடிவுகள் நேற்று வெளியானது. இந்த சூழலில் இளநிலை பிஇ படிப்பில் சேர்வதற்கான விண்ணப்ப பதிவு நேற்று தொடங்கியது.
அதன்படி பிஇ படிப்பில் சேர்வதற்கான ஆன்லைன் விண்ணப்பதிவில் முதல் நாளான நேற்று மாலை 6 மணி நிலவரப்படி 18,763 விண்ணப்பித்துள்ளனர்.
அதில் 4,199 பேர் கட்டணம் செலுத்தியுள்ளனர். அதேபோல் 790 பேர் சான்றிதழ்களை பதிவேற்றம் செய்துள்ளனர். மேலும் மாணவர்கள் தாங்களாகவே விண்ணப்பிக்கலாம் அல்லது தங்கள் பள்ளிகள் மூலமாகவும் விண்ணப்பிக்கலாம். பொறியியல் மாணவர்கள் சேர்க்கை சேவை மையத்திற்கு சென்று விண்ணப்பிக்கலாம். இதற்காக, மாவட்டத்துக்கு குறைந்தபட்சம் 2 இடங்கள் என்ற அடிப்படையில் 110 மையங்கள் பாலிடெக்னிக் கல்லூரிகளில் அமைக்கப்பட்டுள்ளது.
பூர்த்தி செய்யப்பட்ட விண்ணப்பங்களை சமர்ப்பிக்கவும், அசல் சான்றிதழ்களை பதிவேற்றம் செய்யவும் ஜூலை 19ம் தேதி கடைசி நாள்.
அனைத்து விண்ணப்பதாரர்களுக்கு சமவாய்ப்பு (ரேண்டம்) எண்ணானது ஜூலை 22ம் தேதி வெளியிடப்படும். விண்ணப்பித்த மாணவர்களின் சான்றிதழ்கள் சரிபார்ப்பு ஜூலை 20ம் தேதி முதல் 31ம் தேதி வரை நடைபெறும். மாணவர்களுக்கான தரவரிசைப் பட்டியல் ஆகஸ்ட் 8ம் தேதி வெளியிடப்படும். இவற்றில் ஏதேனும் குறைகள் இருப்பின் ஆகஸ்ட் 9ம் தேதி முதல் 14ம் தேதி வரை தெரிவிக்கலாம். பொறியியல் படிப்பில் சேர விரும்புவோர் http://tneaonline.org என்ற இணையதளம் வாயிலாக விண்ணப்பிக்கலாம். சேர்க்கை குறித்த சந்தேகங்களுக்கு 0462-2912081, 82, 83, 84 & 85, 044-22351014,044-22351015 என்ற எண்ணில் தொடர்பு கொள்ளலாம். இவ்வாறு அதில் கூறப்பட்டுள்ளது.
