பள்ளி, கல்லூரி மாணவர்களுக்கு ரூ.20 லட்சம் வரை கல்வி உதவித்தொகை; SBI ஆஷா திட்டம்

பள்ளி கல்வி முதல் வெளிநாடுகளில் கல்வி பயிலும் மாணவர்கள் வரை வழங்கப்படும் ஒரு முக்கிய கல்வி உதவித்தொகை பற்றி தெரியுமா? எஸ்பிஐ வங்கியை பற்றி நமக்கு தெரியும், ஆனால் அங்கு மாணவர்களின் கவ்லிக்கு எஸ்பிஐ பவுண்டேஷன் மூலம் ஆஷா கல்வி உதவித்தொகை திட்டம் செயல்படுத்தப்படுகிறது என்பது பலருக்கு தெரிவதில்லை. குறைந்தபட்சம் ரூ.15,000 முதல் அதிகபடியாக ரூ.20 லட்சம் வரை கல்வி உதவித்தொகை வழங்கப்படுகிறது.

நீங்கள் பள்ளி, கல்லூரிகளில் படித்து வருகிறீர்களா? அப்படி என்றால் இந்த கல்வி உதவித்தொகை திட்டத்தைப் பற்றி கட்டாயம் அறிந்துகொள்ள வேண்டும். எஸ்பிஐ பவுண்டேஷன் மூலம் பள்ளி, கல்லூரி பயிலும் மாணவர்களுக்கு கல்வி உதவித்தொகை வழங்கப்படுகிறது. எஸ்பிஐ பிளாட்டினம் ஜூபிலி ஆஷா உதவித்தொகை (SBI Platinum Jubilee Asha Scholarship 2025) வழங்கப்பட்டு வருகிறது. இந்தியாவில் மட்டுமின்றி வெளிநாடுகளில் கல்வி பயிலும் மாணவர்களும் இத்திட்டத்தின் விண்ணப்பிக்கலாம். இந்நிலையில் 2025-ம் ஆண்டுக்கான அறிவிப்பு வெளியாகி விண்ணப்பம் தொடங்கியுள்ளது. ஆர்வமுள்ளவர்கள் நவம்பர் 15 வரை விண்ணப்பிக்கலாம்.

SBI ஆஷா கல்வி உதவித்தொகை 2025-26
பொருளாதாரத்தில் பின்தங்கிய குடும்பத்தை சேர்ந்த நன்கு படிக்கும் மாணவர்களுக்கு கல்விக்கு உதவும் வகையில் இத்திட்டம் செயல்படுத்தப்படுகிறது. பள்ளி, கல்லூரியில் இளங்கலை, முதுகலை, மருத்துவம் ஆகிய கல்வி நிலைகளுக்கு மட்டுமின்றி, ஐஐடி மற்றும் ஐஐஎம் கல்வி நிறுவனத்தில் பயிலும் மாணவர்களும் கல்வி உதவித்தொகை வழங்கப்படுகிறது. இந்தாண்டு இதற்கு ரூ.90 கோடி நிதி ஒதுக்கப்பட்டுள்ளது. இதன் மூலம் 23,230 மாணவர்கள் தேர்வு செய்யப்பட உள்ளனர்.

பள்ளி மாணவர்களுக்கான கல்வி உதவித்தொகை

• 9 முதல் 12ஆம் வகுப்பு வரை பயிலும் மாணவர்களாக இருக்க வேண்டும்.
• முந்தைய வகுப்பில் 75 சதவீத மற்றும் அதற்கு மேல் மதிப்பெண்கள் பெற்று இருக்க வேண்டும்.
• விண்ணப்பிக்கும் மாணவர்களின் குடும்ப வருமான ரூ.3 லட்சத்திற்கு குறைவாக இருக்க வேண்டும்.
• பள்ளி மாணவர்களுக்கு ரூ.15,000 வரை வழங்கப்படும்.

இளங்கலை/ முதுகலை பட்டப்படிப்பு மாணவர்களுக்கான கல்வி உதவித்தொகை

• இந்தாண்டு வெளியான NIRF தரவரிசையில் முதல் 300 இடங்கள் பெற்ற கல்லூரி அல்லது பல்கலைக்கழகங்களில் ஏதேனும் ஒரு இளங்கலை அல்லது முதுகலை பட்டப்படிப்பில் பயில வேண்டும்.
• முந்தைய ஆண்டில் 7 CGPA அல்லது 75 சதவீத மதிப்பெண்கள் பெற்றிருக்க வேண்டும்.
• குடும்ப வருமான ரூ.6 லட்சம் வரை இருக்கலாம்.
• இளங்கலை கல்லூரி மாணவர்களுக்கு ரூ.75,000 வரையும், முதுகலை மாணவர்களுக்கு ரூ.2,50,000 வரையும் கல்வி உதவித்தொகை வழங்கப்படும். இதில் மருத்துவம் படிக்கும் மாணவர்களுக்கு ரூ.4,50,000 லட்சம் வரை உதவித்தொகை வழங்கப்படும்.

ஐஐடி, ஐஐஎம் கல்வி நிறுவன மாணவர்களுக்கான கல்வி உதவித்தொகை

• ஐஐடி-யில் ஏதேனும் ஒரு இளங்கலை பட்டப்படிப்பு, ஐஐஎம்-யில் எம்பிஏ மற்றும் பிஜி டிப்ளமோ படிக்கும் மாணவர்களுக்கு வழங்கப்படுகிறது.
• முந்தைய ஆண்டில் 75 சதவீத மதிப்பெண் அல்லது CGPA 7 பெற்றிருக்க வேண்டும்.
• குடும்ப வருமான ரூ.6 லட்சத்திற்கு குறைவாக இருக்க வேண்டும்.
• ஐஐடி மாணவர்களுக்கு ரூ.2,00,000 வரையும், ஐஐஎம் மாணவர்களுக்கு ரூ.5,00,000 வரையும் வழங்கப்படும்.

வெளிநாட்டில் படிக்கும் மாணவர்களுக்கு கல்வி உதவித்தொகை

• வெளிநாட்டில் கல்வி பயிலும் எஸ்சி, எஸ்டி மாணவர்களுக்கு மட்டும் வழங்கப்படும்.
• QS/THE World University Rankings 2024-25 பட்டியலில் முதல் 200 இடங்களை பெற்றிருக்க வேண்டும்.
• முந்தை ஆண்டில் 75% மதிப்பெண் அல்லது 7 CGPA கட்டாயம் மற்றும் குடும்ப வருமான ரூ.6 லட்சம் வரை இருக்கலாம்.
• ரூ.20,00,000 வரை கல்வி உதவித்தொகை வழங்கப்படும்.

இதில் எஸ்சி, எஸ்டி பிரிவு மாணவர்களுக்கு 10 சதவீத தளர்வு வழங்கப்படுகிறது. மேலும் 50 சதவீத இடங்கள் பெண்களுக்கும், 50 சதவீதம் எஸ்சி, எஸ்டி மாணவர்களுக்கும் வழங்கப்படும். புதிதாக விண்ணப்பித்து பெறுபவர்கள் அடுத்தத்தடுத்த ஆண்டுகளில் நிபந்தனைகளுக்கு உட்பட்டு புதுப்பித்துக்கொள்ளலாம்.

SBI ஆஷா கல்வி உதவித்தொகை 2025 விண்ணப்பிப்பது எப்படி?
இத்திட்டத்தின் கீழ் விண்ணப்பிக்க விரும்பும் மாணவர்கள் https://www.sbiashascholarship.co.in/ என்ற இணையதளத்தில் ஆன்லைன் வழியாக எளிமையான முறையில் விண்ணப்பிக்கலாம். விண்ணப்பிப்பதற்கு முன்பு அதற்கு தேவையான ஆவணங்களை தயார் நிலையில் வைத்திருக்க வேண்டும்.
படி 1 : மேல் குறிப்பிட்டுள்ள இணையதளத்திற்கு செல்லவும்.
படி 2 : இமெயில் ஐடி, மொபைல் அல்லது கூகுள் கணக்கு மூலம் முதலில் பதிவு செய்து ஐடி பெறவும்.
படி 3 : ஐடி உள்ளிட்டு லாங்கின் செய்யவும். ‘SBI Platinum Jubilee Asha Scholarship 2025-26’ என்ற விண்ணப்பத்தை நிரப்பவும்.
படி 4 : தேவையான ஆவணங்களை பதிவேற்றம் செய்யவும்.
படி 5 : ‘Terms and Conditions’ அட்சப்ட் கொடுத்து, ‘Preview’ கொடுத்து விண்ணப்பத்தை சரிபார்த்து சப்மிட் செய்யவும்.